my 5th blog

مساء الخير جميعا..

مصدقه نفسي... ههههههههه

اللي حلو في موضوع مدونتي اني شبه متأكده ان مفيش حد بيقرا اللي بكتبه..فكاني بكتب لنفسي..

المهم .. انا اللي عايزة اعرفه هو ليه جوزي مخليني اخر حاجه في اولويات حياته...

يعني مبيجيش علشان يتعشي الا الساعه 11 و ده لو محاسب للوقت و لاني زنيت علي دماغه قبل ما يخرج

و لو واخد راحته بيبقي العشا نص الليل..

السؤال اللي بيطرح نفسه.. انا ليه حاسه اني في رمضان طول السنه؟؟

يا بني روح اتعشي عند مامتك و انا هتعشي عند امي..

اعملك ايه يعني؟؟

العمل عمل ربنا!!

my fourth blog

انا مش عارفه مالي زهقانه اوي من كل حاجه

بس اللي مدايقني اني زهقانه من جوزي..

كله يوم زي اللي قبليه

مفيش اي نوع من التغير لما زهقت ..حتي مفيش خروج ولا حاجه و حتي لما نخرج ده لو عملناها.. يفضل يسالني عايزة تروحي فين و في النهايه نروح لنفس الحته اللي بنروحها كل مره

,و كمان انا بقوله كل حااااااجه بتحصلي في الشغل, مع صحباتي, مع خواتي (الحجات العاديه) بس هو مبينطقش..

و لما بخلص كل الكلام اللي عندي يفضل يسالني هو انتي ساكته ليه

معنديش حاجه اقولها ليك يا اخي..ما تتكلم انت

بحس اني مبعرفوش ..

my 3rd blog

صباح الورد

بقولها لامي و  لاغلي صاحبه عندي.. اتصلو بيا النهارده الصبح علشان يتطمنو عليا

اصلي امبارح كنت زعلانه من شوية حجات كانت مديقاني اوي

ميرسي اوي ليكو...

at least there are people who love me in this life.. that is comforting in a big sense...

love you loads

my 2nd blog

..عارفه رجعت بدري اوي..بس نسيت اقول ان بكره عيد ميلاد جوزي و عيد جوازنا في نفس الوقت
بس عامله له مفاجأه بكره ,,, عملت اوردر لتورته جاتوه و بعتاها للشغل عنده ..
مش عايزة التورتة عندنا في البيت علشان عامله دايت بجد لاني بجد تخنانه حبتين

يا رب تعجبه المفاجأه,,

my first blog

مساء الخير لأي حد يقرا مدونتي.

عايزة ابتدي بمقدمه بسيطه عني..

عندي 32 سنه..لسه متوزجه من سنتين... مفيش عيال لسه.. و مش عايزة افكر في الموضوع لاني من اول شهر جواز و الناس بتسألني..

شغاله في شركه من الصبح لغاية المغرب..و مبشوفش جوزي غير نص الليل لمدة نص ساعه ده لو منمتش قبل ما يجي هو الراخر...

بحب الفلام العربي القديمة و مجلة حواء (عارفه...بس بحبها اصلها مفيده اوي) و الشاي الاخضر

تعبانه من الشغل حالي حال غيري ..بس المشكله اني وصلت لمرحله صعبه حبيتين لانها هتأثر علي حياتي مع اهلي و جوزي و اهله و صحابي ..ده لو فضلي صحاب لاني تقريبا كده مبشوفش حد...

بحب القطه بتاعتي اللي سيبتها في بيت ماما لان اهل جوزي مبيحبوش القطط و لان معنديش وقت اخد بالي منها و بخاف عليها تموت من الجوع و لا تضيع وانا في الشغل

بيقول عدويه ان الدنيا حبه فوق و حبه تحت.. للاسف اني ابتديت مدونتي بالحبه اللي تحت... يا رب اشوف الحبه اللي فوق عما قريب..

و الي تدوينه تانيه قريبا...انتظرونا :)